सुप्रसिद्ध कवी प्रा. उत्तम भगत यांचा सोशल एज्युकेशन मूव्हमेंटच्या समाजभूषण पुरस्काराने गौरव

चेतना कॉलेजमध्ये आंबेडकर विचारांचा जागर

मुंबई : डॉ. बाबासाहेब आंबेडकर यांच्या विचारांचा प्रसार व अभ्यास वाढविण्याच्या उद्देशाने चेतना कॉलेज, वांद्रे (मुंबई) येथील डॉ. बाबासाहेब आंबेडकर अध्यासनाच्या वतीने दरवर्षी स्मृती व्याख्यानमाला आयोजित केली जाते. याच परंपरेला अनुसरून यावर्षी गुरुवार दि. १६ एप्रिल २०२६ रोजी अत्यंत अभ्यासपूर्ण आणि विचारप्रवर्तक व्याख्यानाचे आयोजन करण्यात आले होते.

या कार्यक्रमासाठी प्रमुख वक्ते म्हणून डॉ. व्ही. बी. तायडे, माजी प्राचार्य एल्फिन्सटन कॉलेज यांची उपस्थिती लाभली. त्यांनी “डॉ. बाबासाहेब आंबेडकर यांचे आर्थिक विचार आणि समकालीन समर्पकता” या विषयावर सखोल विवेचन करताना आंबेडकरांच्या आर्थिक धोरणांचा आजच्या बदलत्या सामाजिक-आर्थिक परिस्थितीत किती मोठा संदर्भ आहे, हे प्रभावीपणे स्पष्ट केले. त्यांनी विशेषतः आर्थिक समता, संसाधनांचे न्याय्य वाटप आणि शाश्वत विकास या बाबींवर आंबेडकरांनी मांडलेले विचार आजही तितकेच महत्त्वाचे असल्याचे अधोरेखित केले.

या कार्यक्रमाच्या निमित्ताने सोशल एज्युकेशन मूव्हमेंटच्या वतीने दिला जाणारा प्रतिष्ठेचा राज्यस्तरीय “समाजभूषण” पुरस्कार आंबेडकरी चळवळीत दिलेल्या योगदानाबद्दल सुप्रसिद्ध कवी प्रा. उत्तम भगत यांना प्रदान करण्यात आला. हा पुरस्कार स्वीकारताना प्रा. भगत म्हणाले की, "झालेला आनंद, समाधान आणि जबाबदारीची जाणीव अधिक दृढ करणारा हा क्षण आहे. समाजकार्य, शिक्षण आणि प्रबोधनाच्या क्षेत्रात केलेल्या योगदानाची ही पावती असल्याची भावना मनात दाटून आली."

या समारंभात चेतना संस्थेचे अध्यक्ष पंडित श्रीदत्त हळदणकर, प्राचार्य डॉ. संजय जगताप, कार्यक्रमाचे अध्यक्ष प्रा. आनंद देवडेकर तसेच प्रा. गजानन डोंगरे यांसह अनेक मान्यवरांची उपस्थिती लाभली. त्यांच्या मार्गदर्शनामुळे कार्यक्रम अधिक समृद्ध झाला.

एकंदरीत, हा कार्यक्रम केवळ व्याख्यानापुरता मर्यादित न राहता विचारांची देवाणघेवाण, सामाजिक जाणीव आणि प्रेरणा देणारा ठरला. अशा उपक्रमांमुळे समाजात प्रबोधनाची चळवळ अधिक बळकट होऊन आंबेडकर विचारांची उजळणी होत राहील, यात शंका नाही.